Eftir að ég byrjaði í bollubakstrinum um helgina var ekki aftur snúið og síðast í morgun var farið á fætur og “skellt” í nokkrar góðar bollur handa samstarfsfólki mínu (sjá uppskrift). Ég var með svo mikið af hinu flotta og skemmtilega omnom súkkulaði svo ég missti mig alveg í morgun og setti allar sex tegundirnar sem ég hafði undir höndum og meira til. Umbúðirnar eru líka svo skemmtilegar að þær fengu sér myndatöku eins og sjá má hér
Mitt uppáhálds súkkulaði eftir þetta smakk er salt og lakkrís ásamt söltuðu möndlunum.
Hérna koma svo morgunverkin sem samstarfsfólk mitt gaf góða dóma á morgunfundinum:
Hér var gerð tilraun með “langa jóns” útgáfu í vatnsdeigsbolluformi. Ofan á setti ég heimagerða karamellu og saxað omnom súkkulaði en inni var meira saxað súkkulaði og rjómi.
Þessi var hugsuð fyrir elskhugana og tilvalinn á Valentínusardaginn, Bóndadaginn eða Konudaginn. Klassískar með sultu, rjóma og súkkulaðiglassúr.
Þessar fengu brætt suðusúkkulaði og saxað omnom súkkulaði til viðbótar. Þessar þurfa enga sultu á milli þar sem súkkulaðið gefur sæta keiminn á móti bollunum og rjómanum.
Hér gerði ég tilraun með að bragðbæta deigið sjálft og setti út í nokkrar tsk af kakói. Þær fengu því gott súkkulaðibragð án þess að þurfa glassúr. Snilld sem látlausar en góðar bollur með flórsykri.
Að lokum voru fleiri langar bollur sem fengu bleikan glassúr, súkkulaðiglassúr, brætt súkkulaði, sykurperlur, saxað súkkulaði og fleira gott.
Hvet ykkur til að prufa ykkar uppáháldsgóðgæti með bollunum í ár!
- Hitið ofninn í 200°C
- Hitið saman vatn og smjörlíki þangað til smjörlíkið er alveg bráðið og takið af hellunni
- Blandið hveitinu saman við vatnið og smjörlíkið með sleif, hrærið saman þangað til degið losnar af sleifinni og stráið salti yfir. Leyfið að kólna aðeins.
- Þeytið eggin og blandið þeim svo saman við deigið í hrærivél eða með handþeytara. Setjið smá í einu en passið að hræra ekki of mikið. Passið að deigið má ekki vera of lint.
- Setjið deigið á plötu með smjörpappír, annaðhvort með tveim skeiðum eða sprautupoka. Munið að hafa nóg bil á milli þar sem þær stækka nokkuð.
- Bakið í 20-30 mínútur í miðjum ofni. Passið að opna EKKI ofninn fyrstu 15 mínúturnar annars geta bollurnar fallið. Það er þó gott að taka eina út þegar tíminn er kominn til að athuga hvort þær séu ekki örugglega full bakaðar.*
- Blandið saman smá vatni við flórsykur og hrærið saman með gaffli eða písk. Magn af hvorutveggja fer alveg eftir smekk. Þó er betra að hafa glassúrinn ekki of þykkann/stífan svo þið getið auðveldlega díft bollunum í.
* Ég bakaði tvöfalda uppskrift og setti inn tvær plötur með viftuna á og þurfti alveg 30 mínútur. Það verður hörð skel fyrst en svo mýkist hún upp.
Hugmyndir að fyllingum:
- Sulta og þeyttur rjómi
- Royal búðingur (karamellu, vanillu, súkkulaði), blandið duftinu saman við helming af magni vökvans sem tilgreint er á pakkningunni. Leyfið að stífna og setjið svo inn í bollurnar. Gott er að hafa smá þeyttan rjóma með.
- Þeytið saman stífan búðing og rjóma.
- Nutella og rjómi.
- Bananar, nutella og rjómi.
- Leyfa hugmyndafluginu að ráða!
Ertu ekki að grínast??? Lítur ‘ógeðslega’ vel út!!! Vá hvað ég væri til í að smakka eina af hverju! Sendiru til Noregs? Býð mig fram sem tilraunakanínu!