Nú fara fermingarnar að ná hámarki og ekki seinna vænna en að fjalla aðeins um barnvænu útgáfuna af Kransaköku eða Rice Krispies Turn.
Mér hefur þótt þeir ná meiri vinsældum á síðari árum og oftar en ekki má finna báðar útgáfur í fjölmennum fermingarveislum. Ég man ansi vel eftir frumraun minni en hún var gerð fríhendis og heppnaðist ekkert sérlega vel að mínu mati en eftir að ég las mér betur til, skoðaði aðrar uppskriftir og bar saman við hefðbundið rice krispies áttaði ég mig á nokkrum lykilatriðum, t.d. að betra er að setja minna af rice krispies en meira til að gera blönduna stöðugri og það getur verið gott að nota súkkulaðihjúp ef þið eruð í vandræðum með að fá súkkulaðið til að stífna.
Hér má líta mynd af kransaköku fyrir son fyrrum samstarfskonu minnar en hann er mikill tónlistarunnandi og hefur lært á gítar í fleiri ár. Þetta er ekki nýjasta tertan en ég gleymdi að ná mynd af henni síðustu helgi. Það gerist æ oftar að ég gleymi að mynda meistaraverkin sem verða til.
Uppskriftin sem ég fékk frá vinkonu og styðst enn við í dag er eftirfarandi:
- 500 gr suðusúkkulaði
- 280 gr rice krispies
- 454 gr síróp (1 lítil dós)
- 150 gr smjör
- 100-200 gr dökkur súkkulaðihjúpur til að festa hringina saman
- Kökuskraut að eigin vali
Ég er þó ekki frá því að þetta sé sama eða svipuð uppskrift og hefur verið birt víðsvegar um netheimana og jafnvel Gestgjafanum.
Aðferð:
- Setjið brytjað súkkulaði, síróp og brytjað smjör í pott og bræðið allt saman í þykkan hjúp sem minnir eilítið á karamellu
- Blandið rice krispies saman við og tryggið að súkkulaðið blandist vel við allt saman
Byrjið að raða í kransakökumót*, innsta og ysta hring til að smara tíma og fyrirhöfn. Uppskriftin er nokkið rífleg og því óþarfi að spara. Ef þið hafið áhyggjur af að eiga ekki nóg mæli ég með að sleppa neðast/stærsta hringnum þanga til í lokin.- Skellið í frysti í 5-10 mín. Losið með því að hvolfa mótinu og láta heitt vatn renna á botninn. Þannig losnar þetta strax án þess að vera nota auka feiti. Geymið svo á smjörpappír þangað til allt er orðið klárt.
- Endurtakið leikinn og raðið í miðju hringinn og aftur í frysti.
- Endurtakið leikinn með að losa.
- Þegar þið eruð tilbúin að setja turninn saman er best að vera búin(n) að raða hringjunum eftir stærðarröð til að forðast mistök ásamt því að hafa brætt súkkulaði við höndina. Ég mæli með hjúp þar sem hann storknar nokkuð auðveldlega, ef þið notið annað súkkulaði þurfið þið að hita það hægt til að missa ekki temprunina eða tempra það upp á nýtt.
- Gott er að setja efri hlutann saman, svo neðri (eða öfugt) og enda á að leggja allt saman.
- Skreytið að vild.
*Ég fékk mín í Byggt & Búið á sínum tíma og þau fást þar enn, sjá hér.
